Thursday, April 25, 2024

घाटगद्दी गरी राखेको काठमा आगलागी हुँदा ५० लाख मुल्य बराबरको क्षति

ताजा / भरखरै प्राप्त

चन्द्रपुर- रौतहटको चन्द्रपुर नगरपालिका वडा नम्बर २ स्थित नमुना सामुदायिक वनमा घाटगद्दी गरेको राखेको काठमा आगलागी हुँदा ठुलो परिणाममा काठ जलेर नोक्सान भएको छ । नमुना सामुदायिक वनका अध्यक्ष विनोद चौधरीका अनुसार बुधबार दिउँसो सागरनाथ वन परियोजनाबाट फैलिएको आगो घाटगद्दी गरेर राखेको काठको चाङ्गहरुमा फैलिएको हो । उनका अनुसार सागरनाथ वन परियोजनाको टिकको जङ्गल हुँदै काठमा फैलिएको आगो पूर्ण रुपमा नियन्त्रणमा लिन चन्द्रपुर नगरपालिकाको वारुणयन्त्र, हरिवन नगरपालिकाको वारुणयन्त्र, सुरक्षाकर्मी तथा स्थानियलाई हम्मेहम्मे परेको थियो । आगो एउटा चाङ्गबाट अर्को चाङ्गमा फैलिन नदिन स्काभेटरको सहायताले चाङ्गबाट छुट्याइएको थियो । वर्षौदेखि थुपारेर राखिएको सुकेका काठहरुमा दनदनी बलेको आगो करिब ३ घण्टापछि नियन्त्रणमा लिइएको अध्यक्ष चौधरीले जनाए । आगोले १५–१६ वटा काठको चाङ्गमा लागेको र अन्दाजी ५० लाख हाराहारीको नोक्सानी भएको प्रारम्भिक अनुमान गरिएको अध्यक्ष चौधरीको बताए । आगलागीबाट जलेका काठहरु अधिकांस सखुवा प्रजातिका रहेको डिभिजन वन कार्यालय रौतहटले जनाएको छ । आगलागीबाट कति परिणामको काठ जलेर नष्ट भएको त्यसको एकिन विवरण अहिलेसम्म नआइपुगेको डिभिजनल वन अधिकृत सुनिल कुमार कर्णले बताए ।
सो स्थानमा घाटगद्दी राखिएका काठहरु हेटौंडा–ढल्केवर–दुहबी ४ सय केभी प्रसारण लाइनको टावर निर्माण गर्दा काटिएका रुखहरु रहेका थिए  । करिब २ वर्षदेखि अलपत्र छाडिएको काठ–दाउरा कुहिँदा पनि डिभिजन वन कार्यालयले त्यसको व्यवस्थापनमा कुनै चासो नदिएको अध्यक्ष चौधरीको भनाइ छ । उनले आफुहरुले बारम्बार डिभिजन वन कार्यालयका प्रमुख तथा कर्मचारीहरुलाई काठहरु कुहिएर नास हुन लागेकाले चाँडै लिलाम प्रक्रिया अगाडि बढाउन आग्रह गरेपनि कार्यालयले समयमै कुनै चासो नदिदाँ आज ठुलो नोक्सानी बेर्होनु परेको गुनासो गरे । यता डिभिजनल वन अधिकृत कर्ण भने आफुहरुले यस बारेमा प्रक्रिया अगाडि बढाइसकेको तर बिचमा केही ऐन तथा नियमावलीहरु संसोधन भएर पुनः वर्गिकरण लगायतका प्रक्रियाहरु गर्नु परेका केही ढिलाइ भएको बताउँछन् । उनले कार्यालयले काठको अवस्था हेरेर ‘ए’, ‘बी’, ‘सी’ र ‘डी’ गरी ४ भागमा वर्गीकरण गरेको र ‘ए’ वर्गको काठको १ हजार, ‘बी’ को ७ सय, ‘सी’ को ५ सय र ‘डी’ को २ सय ५० रुपैयाँका दरले आपूर्ति समिति मार्फत चाँडैनै सर्वसाधरण लगायतलाई बिक्री वितरणको तयारी गरिरहेको जनाए ।

spot_imgspot_img
spot_img

लोकप्रिय

Related Articles