माछापुच्छे बैकबाट अरुको खाता ह्याक गरी ९ लाख रुपैया चोरी गर्ने ७ जना प्रहरीको फन्दामा

रौतहट,१५ असार
रौतहटको चन्द्रनिगाहपुरमा रहेको माछापुच्छे बैकबाट एक सेवाग्राहीको खाता ह्याक गरी पैसा चोरी गर्ने ७ जनालाइ इलाका प्रहरी कार्यालय चन्द्रनिगाहपुरले पक्राउ गरेको छ ।
रौतहटको वृन्दावन नगरपालिका वाड नं. ३ निवासी रामेश्वरराय यादवको माछापुच्छ्रे बैंक चन्द्रनिगाहपुर शाखाको खाताबाट जेठ ५ गते गैरकानुनी रूपमा ९ लाख ट्रान्सफर गरेको आरोपमा उनीहरू पक्राउ परेको हुन् । उनीहरूलाई प्रहरीले शुक्रबार सार्वजनिक गरेको छ।
यादवको माछापुच्छ्रे बैंकको खाता नम्बर ०७५००६५३८२८०००१४ मा रहेको ९ लाख रकम जेठ ५, ६ र ७ गते दैनिक ३ लाखका दरले अन्य बैंकको खाता र खल्ती सेवामा अनधिकृत रूपमा रकम ट्रान्सफर गरी ठगी गरेको प्रहरीको अनुसन्धानमा खुलेको छ ।
पक्राउ पर्नेमा पर्सा वीरगन्ज महानगरपालिका वाड नंं १६ नगवाका २१ वर्षीय राजनारायण चौरासिया, वडा नम्बर १९ केहुनी विन्दावासनीका २१ वर्षीय महम्द मुस्तुफा हवारी, दोलखा वैदेश्वर गाउँपालिका–५ सिमबारी टोलका २९ वर्षीय सुन्दर खड्का, काभ्रेपलाञ्चोक भुम्लु गाउँपालिका–९ पिङगोलाका १९ वर्षीय महेश थापा, उदयपुर रौउतामाई गाउँपालिका–२ भुट्टारका २० वर्षीय केवल रास्कोटी, सिरहा मिर्चैया नगरपालिका–८ भगवानपुरका १९ वर्षीय दीपे सदा र २३ वर्षीय श्रवण दास रहेको इलाका प्रहरी कार्यालय चन्द्रनिगाहपुरका प्रहरी नायब उपरिक्षक एक नारायण कोइरालाले जानकारी दिएका छन्।
उनीहरूको साथबाट ६ थान मोबाइल, विभिन्न व्यक्तिको विभिन्न बैंकको १५ थान एटीएम कार्ड, मोटरसाइकल १ थान र ६६ हजार नगद बरामद गरेको प्रहरी नायब उपरिक्षक कोइरालाले बताए ।
पक्राउ परेकाले अनधिकृत रूपमा बैंकको खातामा पहुँच पु¥याई विभिन्न व्यक्तिको खातामा रकम ट्रान्सफर गरी आर्थिक अपचलन गरेको अनुसन्धानबाट खुलेको हो। उनीहरूले अनधिकृत रूपमा ट्रान्सफर भएको रकम एटीएमबाट गैरकानुनी तवरले निकाली आर्थिक लाभ लिने गरेको अनुसन्धानबाट खुलेको छ ।
इलाका प्रहरी कार्यालय चन्द्रनिगाहपुरका प्रमुख कोइरालाका अनुसार पक्राउ परेकाहरुले विभिन्न व्यक्तिलाई आर्थिक प्रलोभनमा पारी खाता खोल्न लगाई खातावालाको मोबाइलमा अनलाइन बैंकिङको यूजर नेम र पासवर्ड समेत लिएर खाताबाट रकम ट्रान्सफर गरेको अनुसन्धानमा खुलेको छ । माछापुच्छ्रे बैंकबाट यादवको रकम निकालेको घटनामा ११ जना संलग्न रहेको पनि ४ जना अझै फरार रहेको प्रहरीले जनाएको छ । पक्राउ परेकाहरुलाई ठगी सम्बन्धी कसुरमा मुद्दा चलाइएको उनले जानकारी दिए ।