निशा गुरुङ
हेटौंडा–वागमती प्रदेशसभाको बैठक जेठ १६ गतेसम्मका लागि स्थगित भएको छ । प्रदेशसभाका सभामुख सानुकुमार श्रेष्ठले अर्को बैठक १६ गते दिउँसो २ बजे बस्ने गरी स्थगित गरेका हुन् । आगामी जेठ १६ गते बस्ने प्रदेशसभा बैठकमा सरकारको नीति तथा कार्यक्रम प्रस्तुत हुनेछ ।
शुक्रबारदेखि सुरु भएको प्रदेशसभाको दशौं अधिवेशनअन्तर्गत् शनिबार बसेको तेस्रो र चौथो बैठकमा सरकारको आगामी आर्थिक वर्ष २०७९÷०८० को विनियोजन विधेयकका सिद्धान्त र प्राथमिकतामाथि छलफल भएको थियो ।
बैठकमा दलगत्रुपमा सांसद्हरुले सरकारले ल्याएको विनियोजन विधेयकमाथि आफ्ना धारणा राखेका थिए भने छलफलमा उठेका प्रश्नहरुको प्रदेश सरकारका आर्थिक मामिला तथा योजना मन्त्री शालिकराम जम्कट्टेलले जवाफ दिएका थिए ।
बैठकमा प्रमुख प्रतिपक्षी दल नेकपा एमालेका नेता एवम् प्रदेशका पूर्वअर्थमन्त्री कैलाशप्रसाद ढुंगेलले सरकार परिवर्तन भए पनि सरकारको प्राथमिकताको क्षेत्र परिवर्तन हुन नसकेको बताए । उनले विनियोजन विधेयकका सिद्धान्त र प्राथमिकतामाथि छलफलमा भाग लिँदै सरकारले विगतको भन्दा पनि कमजोर योजनाहरु ल्याएको उनले बताए ।
उनले गठबन्धन सरकारले निर्वाचनमा गठबन्धनले नजिते वडामा बजेट नदिने भन्ने अभिव्यक्तिले निर्वाचन प्रभावित भएको दाबी गरे । उनले प्रदेश सरकारले जनपक्षीय कामका लागि कुनै पनि योजना ल्याउन नसकेको दाबी गरे । उनले स्थानीय निर्वाचनमा गठबन्धन सरकारले निर्वाचन जित्नैको लागि सत्ताको दुरुपयोग गरेकोसमेत बताए । उनले पेट्रोलियम पदार्थको मूल्य बढिरहेको अवस्थामा अघिल्ल्लो प्रदेश सरकारले विद्युतीय सवारीसाधन चलाउन योजना ल्याउँदा वर्तमान सरकारले बेवास्ता गरेको बताए ।
ढुंगेलले प्रदेश सरकारलाई मन्त्रीकै लागि खर्च गर्न बजेट नपुगेको भन्दै जनताका समस्याका लागि कुनै ध्यान नगएको टिप्पणी गरे । ‘प्रदेश सरकारलाई १८ मन्त्री आवश्यक छ,’ प्रश्न गदै उनले भने–यी सबैको भरणपोषण गर्दा बिउ कहाँबाट ल्याउनु, मल कहाँबाट ल्याउनु ? उनले किसानहरु मल नपाएर समस्यामा परेका बेलामा सरकारले त्यसतर्फ ध्यान दिन नसकेको बताए । नेता ढुंगेलले गठबन्धन नेतृत्वको सरकारले काम चलाउनका लागिमात्र बजेट ल्याउन लागिपरेको आरोपसमेत लगाए ।
उनले एमालेलाई हराउनका लागि वर्तमान सरकारले निर्वाचनको समीप्यतामा ऐनविपरीत २ हजार ३ सय योजनाहरु बाँड्ने काम गरेको बताए । नेता ढुंगेलले वर्तमान सरकारले अघिल्लो सरकारले ल्याएको बजेटका सिद्धान्त र प्राथमिकताका विषयहरु ल्याएको बताए । मन्त्री जम्कट्टेलले सरकारले जनतालाई लक्षित गरेर कार्यान्वयन हुने प्रकृतिको नीति तथा कार्यक्रम र बजेट ल्याउने गरी आफ्नो सिद्धान्त र प्राथमिकताहरु तयार पारेको बताए । उनले सोहीअनुसार सरकारको बजेटले जनतालाई सम्बोधन गर्ने र कार्यान्वयन हुने प्रकृतिको नीति तथा कार्यक्रम ल्याउन सरकार सक्रिय रहेको बताए ।
