चन्द्रनिगाहपुर,१७ असोज
नेपालीहरूको महान् पर्व बडा दसैँको पहिलो दिन आज घटस्थापनाका अवसरमा रौतहटको चन्द्रनिगाहपुर सहित सम्पूर्ण देशभर विशेष पूजापाठका कार्यक्रम आयोजना भइरहेका छन् । दशैको कलश स्थापना गरेर नवरात्रीको शुभारम्भ गरिनुका साथै विशेष पूजा आराधना गरिएको छ । विशेष गरी रौतहटको चन्द्रनिगाहपुर,गौर,गरुडा,कटहरिया लगायतका क्षेत्रहरूबाट आज बिहानै वृहत् कलश यात्राको आयोजना गरिएको छ । रौतहट जिल्लाका सम्पूर्ण स्थानीय तहका माता भगवती तथा दुर्गा मन्दिरहरूबाट निस्किएको कलश यात्रामा हजारौँ श्रद्धालुहरूको सहभागिता रहेको थियो । चन्द्रनिगाहपुरमा पनि दुर्गा पुजा समितिको आयोजनामा कलश यात्रा निकालिएको थियो । यस धार्मिक यात्रालाई देवी दुर्गाको स्वागत र श्रद्धाको प्रतीकका रूपमा लिइने पुजा समितिका अध्यक्ष सुरेन्द्र साहले जानकारी दिएका छन । कलश यात्रा भनेको शक्ति स्वरूपा देवी दुर्गालाई आह्वान गर्न आयोजित गरिने धार्मिक यात्रा भएको अध्यक्ष साहको भनाइ छ । यस यात्रामा श्रद्धालुहरूले पवित्र जल, आमका पात, दूर्वा घाँस, फूल र नरिवल सहितको कलश बोकेर मन्दिर वा पूजा स्थलमा लैजान्छन् । कलशलाई देवी दुर्गाको प्रतीक मानिन्छ, र यसले समृद्धि, शान्ति, र शुभताको सन्देश दिन्छ । कलशमा रहेको पवित्र जललाई जीवनको स्रोत मानिन्छ, जसले जीवनको निरन्तरता र उन्नतिलाई दर्साउँछ ।
चन्द्रनिगाहपुर क्षेत्रमा नवरात्रीको अवसरमा विशेष पूजा अर्चना गरिँदै आएको छ । प्रत्येक वर्ष कलश यात्रामा हजारौँ श्रद्धालुहरूको उत्साहजनक सहभागिता हुन्छ । यो यात्रामा सहभागी हुने भक्तजनहरूले देवी दुर्गाप्रति आफ्नो श्रद्धा प्रकट गर्दै नौ दिनसम्म विशेष पूजापाठ र व्रतसमेत गर्ने चलन छ । नवरात्रीको समयमा देवी दुर्गाका विभिन्न रूपहरूको पूजा गरिन्छ, जसमा शैलपुत्री, ब्रह्मचारिणी, चन्द्रघण्टा, स्कन्दमाता, कात्यायनी, कालरात्री, महागौरी र सिद्धिदात्री आदि देवीहरूलाई विशेष सम्मानका साथ पूजा गरिन्छ ।
नवरात्रीको नौ दिनलाई देवी दुर्गाको नकारात्मक शक्तिहरूमाथि विजयको प्रतीकका रूपमा लिइन्छ । प्रत्येक दिन देवी दुर्गाका विभिन्न रूपहरूको पूजा गरिन्छ, जसले शक्ति, साहस र आशीर्वाद दिन्छ । विशेष गरी मधेस प्रदेशको भोजपुरी क्षेत्रमा नवरात्रीको अत्यन्त ठूलो धार्मिक महत्त्व छ । नवरात्रीका बेला कलशको पूजा नौ दिनसम्म गरिन्छ । भक्तजनहरूले दुर्गा सप्तशती, दुर्गा चालिसा, तथा अन्य धार्मिक ग्रन्थहरूको पाठ गरेर देवी दुर्गाको आराधना गर्छन् । प्रत्येक दिन फरक–फरक रङका पहिरन र पूजा सामग्रीको प्रयोग गरिन्छ, जसले प्रत्येक दिनको विशेषतालाई दर्साउँछ । देवी दुर्गाको शक्तिलाई आह्वान गर्न, नकारात्मक शक्तिहरूमाथि विजय प्राप्त गर्न, र जीवनमा सुख, शान्ति, समृद्धि ल्याउन यो पर्वलाई अत्यन्तै महत्त्वपूर्ण मानिन्छ ।
नवरात्रीको अन्तिम दिन, जसलाई विजयादशमी भनिन्छ, कलशको विसर्जन गरिन्छ । कलशमा रहेको पवित्र जललाई नदी, तलाउजस्ता जलाशयहरूमा प्रवाहित गरिन्छ । यसले देवी दुर्गाको आशीर्वाद लिएको प्रतीक मानिन्छ, र देवीले आफ्नो कर्तव्य पूरा गरेर आफ्ना दिव्य धाम फर्किएको धार्मिक विश्वास छ । विजयादशमीले असलले बुराइमाथि विजय प्राप्त गरेको सन्देश दिन्छ, र यस पर्वले धार्मिक, सांस्कृतिक, तथा सामाजिक एकता र सद्भावलाई थप बलियो बनाउँछ । यस वर्ष चन्द्रनिगाहपुरमा बाक्लो संख्यामा भक्तजनहरूको उपस्थितिमा सम्पन्न भएको कलश यात्राले नवरात्रीको विशेष धार्मिक महत्त्वलाई थप उजागर गरेको छ । घटस्थापनादेखि विजयादशमीसम्मको यो धार्मिक यात्रा भक्तजनहरूको आस्था, श्रद्धा र एकताको प्रतीक हो । यसले शक्ति, धैर्यता, र विजयको सन्देश दिने भएकाले भोजपुरी क्षेत्रका बासिन्दाहरूका लागि यो पर्वले विशेष महत्व रहेको अध्यक्ष साहले जानकारी दिएका छन ।
