चन्द्रपुर,७ मंसिर
रौतहटको चन्द्रपुर नगरपालिकामा प्रथम चन्द्रपुर मेयर कप क्रिकेट प्रतियोगिता शुक्रबारबाट सुरु भएको छ । स्थानीयस्तरमा नयाँ–नयाँ खेलाडी उत्पादन गरी समग्र क्रिकेट खेलको विकास, स्थानिय स्तरमा रहेका क्रिकेटरको प्रतिभा प्रस्फुटन गर्ने उद्देश्यले पहिलो पटक पालिकाको सहयोग तथा संघर्ष युवा क्लब, चन्द्रपुर ५ को आयोजनामा टी(२० लीग मेयर कप प्रतियोगिता सुरु भएको हो ।
मंसिर ७ गतेदेखि १७ गतेसम्म सञ्चालन हुने प्रतियोगितामा पालिका अन्तर्गतका रौतहटका ६ वटा पालिका र छिमेकी मुलुक भारतका दुईटीम गरी ८ वटा टीमको सहभागितामा वडा नम्बर ८ स्थित बेतौनामा रहेको कोटीहोम क्रिकेट खेल मैदानमा प्रतियोगिता सुरु गरिएको प्रतियोगिताका संयोजक देवराज कार्कीले बताए ।
खेलको उद्घाटन गर्दै नगर प्रमुख सञ्जय कुमार काफ्लेले “राष्ट्रका लागि खेलकुद, स्वास्थ्यका लागि खेलकुद” भन्ने नारालाइ आत्मसात गर्दै शिक्षासँगै खेलकुदलाई पनि प्राथमिकता दिदै रौतहट फुटबलको मात्र नभई क्रिकेटको समेत उर्वर भूमि हो भन्ने कुरालाई प्रमाणित गर्न पनि यस किसिमका प्रतियोगिताको आयोजना हुन जरुरी रहेको बताए। नगर प्रमुख काफ्लेले नयाँ खेलाडी उत्पादन गर्न समेत सहयोग पुगोस् भन्ने हेतुले मेयर कप क्रिकेट प्रतियोगिता आयोजना गरिएको बताए । क्रिकेटप्रति युवाहरुको रुची बढ्दो छ, सोहीअनुसार युवालाई प्रोत्साहन गर्न र खेल क्षेत्रको विकासका लागि नगरपालिकाको सहयोगमा आफूले पहिलो पटक आयोजना गरेका उनको भनाइ छ ।
पालिकामा क्रिकेट प्रेमी र खेलाडीहरु पनि प्रशस्त भएकोले उनीहरुको अभ्यास र क्षमता बृद्धिका लागि पनि यस्तै प्रतियोगिताबाट प्रोत्साहन हुनेहुदा यसलाई निरन्तरता दिँदै क्रिकेटको विकासमा सहयोग गर्न पालिका सकारात्मक रहेको नगर प्रमुख काफ्लेले बताए ।
मंगलबार भएको उद्घाटन खेलमा गौर नगरपालिकाले चन्द्रपुर नगरपालिकालाई ४ विकेटले पराजित गर्दै जित निकालेको छ । टस जितेर फिल्डिङ रोजेको गौरले १७।२ ओभरमा ८० रन खर्चेर चन्द्रपुरको सबै बिकेट हात पारेको थियो । ८१ रनको लक्ष्य पाएको गौरले १६।१ ओभरमा ५ विकेटको क्षतिमा जीत निकाल्न सकेको हो ।
