चन्द्रपुरमा लम्की स्किन रोगको महामारी ,सयौ पशु मरे

चन्द्रपुर – रौतहटको चन्द्रपुर नगरपालिकामा पशुमा लाग्ने लम्की स्किन रोग महामारीका रुपमा फैलिएको पाइएको छ । सो रोग नियन्त्रण गर्नको लागी चन्द्रपुर नगरपालिकाले नगरक्षेत्रभरी निशुल्क खोप कार्यक्रम सञ्चालन गरेको छ । कृषि क्षेत्रमा आधारित यहाँका अधिंकाश किसान पशुपालनमा आत्मनिर्भर रहेकाले लम्पी स्किनबाट रोक्न नगरपालिकाले निशुल्क खोप तथा उपचार अभियान सुरु गरेको हो ।
सो रोगको कारण हाल सम्म चन्द्रपुर नगरपालिकामा करिब २ सयको हाराहारीमा पशु मरिसकेको अनुमान गरिएको छ । चन्द्रपुर नगरपालिका पशु शाखाले दिएको जानकारी अनुसार असार मसान्त सम्म १ सय २२ वटा गाइ र भैसी मरेको पाइएको छ ।
सो रोग नियन्त्रणको लागी चन्द्रपुर नगरपालिका वडा नं. ४ ले पशु सेवा शाखाको प्रविधिक सहयोगमा गाई भैसीको लम्पी स्किन रोग बिरुद्धको निशुल्क खोप अभियान संचालन गरिएको छ । यस वडाको अधिंकाश घरघरमा गाईभैँसी पालन रहेकाले लम्पी स्किन रोगबाट बचाउनका लागि खोप अभियान संञ्चालन गरेको वडा अध्यक्ष रवी राना मगरले बताए ।
गोठ गोठमै पुगेर पशु चिकित्सक एवं प्राविधिक टोलीले निःशुल्क खोप लगाउने र उपचारका विधिको कार्यको थालनी गरेको उनको भनाई छ । पशु प्राविधिक टोलीले गोठगोठमै पुगेर रोगको जाँच, निःशुल्क खोप, निःशुल्क औषधि वितरण गरी किसानलाई लम्की स्किन रोगबारे जानकारी गराएको उनले बताए । उनका अनुसार वडा नं. ४ मा मात्र ५ सय भन्दा बढि पशुमा लम्पी स्किन रोग विरुद्धको खोप लगाउने योजना छ । चन्द्रपुर नगरपालिकाका पशु शाखाका पशु चिकित्सक डा. सुलव चौधरी सहितको चार टोली बनाएर पशुमा खोप लगाईएको उनले जानकारी दिए । लम्पी स्किन रोग विरुद्धको खोप प्रयाप्त रहेकाले समयमा नै लगाउन वडा अध्यक्ष मगरले वडाबासीमा आग्रह गरेका छन् ।
महामारी नियन्त्रणका लागि वडाले तत्काल सेवा उपलब्ध गराउने व्यवस्था गरेको भन्दै यो रोगबाट पशुमा हुने क्षति रोक्नका लागि ध्यान दिन उनले पशुपालक कृषकसंग अनुरोध गरेका छन् । प्रायः धेरै किसानलाई पशु बीमा गराउनुपर्छ भन्ने ज्ञान नहुँदा पनि क्षति व्यहोर्नुपरेको वडा अध्यक्ष मगरले बताए ।
चन्द्रपुर नगरपालिकाका नगर प्रमुख संजय कुमार काफ्लेले चन्द्रपुर नगर क्षेत्रभरीका गाई, भैँसी र गोरुलाई लम्पी स्किन रोगको बिरुद्धमा खोप लगाउने अभियान नै संञ्चालन गरेको बताएका छन ।
केहि वडामा खोप लगाई सकिएको छ भने बाँकी वडाले कार्यक्रम संञ्चालन गरिरहेको नगर प्रमुख काफलेले जानकारी दिए । पालिकामा भरीका १० वटै वडामा गाई, भैँसी र गोरुलाई लम्पी स्किनको खोप लगाईने नगर प्रमुख काफलेको भनाइ रहेको छ ।
यता चन्द्रपुर नगरपालिका वाड नं.म २ मा भने सो रोग बिरुद्धको खोप लगाउन सकिएको छैन । सो वाडमा अहिले सम्म लम्की स्किन रोगको कारण २० देखी २५ वटा पशु मरिसकेको पशु प्राबिधिक राजन थापाले जानकारी दिएका छन । यस वाडमा पनि चाडो भन्दा चाडो भ्याक्सीन लगाएर कृषकहरुको क्षति जोगाउन उनले जनप्रतिनिधिहरुलाइ आग्रह गरेका छन । यहा महामारी फैलिँदै जाँदा कतिपय व्यावसायिक फार्महरुले आफैँले खोप किनेर समेत पशुमा लगाएको पाईएको उनले बताए ।
रोगबाट सङ्क्रमित गाई भैँसीको दूध उत्पादनमा गिरावट आउनुका साथै उच्च ज्वरो आउने, तौल घट्ने सो रोगको लक्षण भएको चन्द्रपुर नगरपालिका पशु शाखाका डा. सुलभ चौधरीले जानकारी दिए । डा. चौधरीका अनुसार लम्पी स्किन गाई भैँसीलाई हुने सङ्क्रामक रोग हो । लामखुट्टे, टोक्ने झिँगा र किर्ना जस्ता कीराको टोकाइबाट यो रोग सर्ने गरेको उनको भनाइ छ । गर्मीयाममा लामखुट्टे र किर्ना आदिको सङ्ख्या बढ्ने र ती कीरा बढी सक्रिय हुने भएकाले यसको प्रकोप अझ बढी देखिने उनले जानकारी दिए ।